Mühasibin Əsas Vəzifələri Nələrdir?

Oktyabr 19, 2024

438 izlənmə

3 dəqiqə oxuma

Mühasibat uçotu – müəssisənin maliyyətəsərrüfat fəaliyyətində baş verən dəyişikliklər (əməliyyatlar) haqqında məlumatların toplanıb yığılması, dürüstlüyünün təsdiq edilməsi, təhlil edilib nəticələr çıxarılması, o cümlədən qruplaşdırılaraq ümumiləşdirilməsi və sonda əldə edilən nəticələrin hesabat şəklində lazımi istifadəçilərə çatdırılmasıdır. Buna görə də mühasibat uçotuna çox vaxt biznesin rəqəmlər vasitəsilə idarə olunması da deyirlər.

Bəs mühasiblər hansı vəzifələri yerinə yetirirlər?

Çoxları belə düşünür ki, mühasib yalnız müəssisənin gəlir və xərclərinin uçotunu aparan bir şəxsdir. Əksər hallarda mühasibat uçotu qeyd edib saxlama (book keeping) ilə eyniləşdirilir. Halbuki, peşəkar mühasiblər bu işlə məşğul olmur və ya lap az məşğul olur. Ona görə ki, qeydetmə müəssisədəki dəyər hərəkətlərinin olduqca mexaniki bir tərəfidir. Mühasibatlıq isə qeyd edib saxlamağı da daxil etməklə daha genişdir.

Mühasib əməliyyatları qeyd edib saxlamaqdan (book keeping) çox maliyyə hesabatının hazırlanması, maliyyə məlumatlarının işlənib hazırlanması və açıqlanması ilə məşğul olur. Bundan əlavə ümumi hesablamalar, vergi ödəmələri üçün lazımi hesabatlar, büdcə tərtib etmə və nəzarət sisteminin qurulması, araşdırmalar və s. hamısı mühasibatlığın predmetinə daxildir.

Beləliklə, mühasibin qarşısında duran gündəlik vəzifələr aşağıdakılardır:

1) Müəssisənin maliyyə vəziyyətində və maliyyə nəticələrində baş verən dəyişiklikləri qeyd etmək və istifadəçiyə (rəhbərlik, marketinq, kadr və s. şöbələrə) vaxtında çatdırmaq;

2) Dövr (aylıq, rüblük və illik) ərzində əldə edilən gəlirləri və çəkilmiş xərcləri hesablamaq və onları müqayisə etməklə fəaliyyət nəticələrini (mənfəət yaxud zərərlə işləməni) təhlil etmək;

3) Qanuni mükəlləfiyyətləri yerinə yetirmək:
-    öhdəliklərin (kommunal xərclər, icarə haqqı və s.) vaxtında ödənilməsi;
-    vergilərin və sosial ayırmaların dövlət təşkilatlarına vaxtında ödənilməsi;
-    tələb olunan hesabatların vaxtında lazımi dövlət orqanlarına təqdim olunması.

4) Hüquqi anlaşılmazlıqlarda sübutedici vasitə olan sənədləri qaydaya salmaq.

Sən də mühasibatlıq sektorunda uğurlu kadr olmaq istəyirsənsə, praktiki mühasibatlıq kursumuza qoşularaq öz məqsədinə çatmaq yolunda ilk addımını bizimlə at!

Müəllif: Pənah İbrahimli